Рамаҙанов Ринат Заһир улы
| Ринат Заһир улы Рамаҙанов | |
 | |
| Төп мәғлүмәт | |
|---|---|
| Тыуған |
19 сентябрь 1986 (38 йәш) |
| Тыуған урыны | |
| Ил | |
| Һөнәрҙәре |
музыкант |
| Жанрҙар |
этно-рок |
| Наградалар |
Ҡалып:Башҡортостан Республикаһының атҡаҙанған артисы Ҡалып:Шәйехзада Бабич исемендәге дәүләт йәштәр премияһы  |
Рамаҙанов Ринат Заһир улы (19 сентябрь 1986 йыл) — музыкант, мультиинструменталист, йәмәғәт эшмәкәре, «Арғымаҡ» этно-рок төркөмөнөң солисы һәм художество етәксеһе. Бөтә донъя Башҡорт йәштәре ҡоролтайы рәйесе (2016 йылдан), Башҡортостан Республикаһының атҡаҙанған артисы (2019), Башҡортостан Республикаһының халыҡ артисы (2025), Бөтә донъя башҡорттары ҡоролтайының «Ал да сәс нур халҡыңа» миҙалына эйә. Ринат Рамаҙанов тамаҡ төбө менән өзләү оҫтаһы.
Биографияһы
[үҙгәртергә | сығанаҡты үҙгәртеү]Ринат Заһир улы Рамаҙанов 1986 йылдың 19 сентябрендә Мәләүез ҡалаһында тыуған. Атаһы, ябай иретеп йәбештереүсе, сығышы менән Күгәрсен районының Муса ауылынан, әсәһе, математика уҡытыусыһы, Көйөргәҙе районының Йомағужа ауылынан, Ринатта эшһөйәрлек, ныҡышмалылыҡ һәм белемгә ынтылыш тойғоһо тәрбиәләй[1].
Ринат бала саҡтан башҡорт халыҡ музыкаһына ынтылыш күрһәтә. 7 йәшендә музыка мәктәбенең халыҡ уйын ҡоралдары бүлегенә уҡырға инә, унда ҡурайҙа уйнарға өйрәнә. Профессиональ музыка донъяһына беренсе булып Нурыев Тәлғәт Мөхәрләм улы, ҡурайҙа уйнау уҡытыусыһы, юл күрһәтә[2].
1992—2001 йылдарҙа Мәләүез ҡалаһының 1-се, 2001-2003 йылдарҙа 9-сы гимназияһында уҡый. Мәктәпте тамамлағас, Салауат музыка училищеһына уҡырға инә, уны ҡыҙыл диплом менән тамамлай. Училищела Президент стипендиаты, күп кенә республика һәм Рәсәй конкурстары лауреаты була. 2012 йылда Заһир Исмәғилев исемендәге Өфө дәүләт сәнғәт академияһын уңышлы тамамлай, «Башҡорт музыкаһы» һөнәре буйынса диплом ала[3].
Ижады
[үҙгәртергә | сығанаҡты үҙгәртеү]2009 йылда Рамазанов «Арғымак» этно-рок төркөмөнә нигеҙ һала. Төркөм әкренләп тыуған төбәгендә, ә һуңынан халыҡ-ара кимәлдә популярлыҡ яулай, фольк-фестивалдәрҙә ҡатнаша һәм Европа һәм Азияның билдәле майҙансыҡтарында концерттар менән сығыш яһай. Этно-коллектив репертуарында башҡорт халыҡ йырҙары һәм көйҙәре, ҡобайырҙар, эпостар һәм легендалар бар. Төркөм солисы Ринат Рамаҙанов йыр һүҙҙәрен рэп итеп тә уҡый, тамаҡ төбө менән өзләй. Инструменталь состав: ҡурай, думбыра, ҡумыҙ, ҡыл-ҡумыҙ, гитара, дөңгөр ҡушылып йырлана[2]. 2019 йылда «Арғымаҡ» музыканттары Сәғүд Ғәрәбстанында King Abdulaziz Camel Festival фестивалендә Гран-при яулай, (100 ил вәкилдәрен уҙып китә һәм 10 000 доллар премия ала), шулай уҡ Ҡаҙағстанда үткән «Бөтә донъя күсмә халыҡтар уйындарында» «Этно-хит» категорияһында еңеүсе була. Ҡырымда «Таврида АРТ» Бөтә Рәсәй форумында дөйөм суммаһы ике миллион һумлыҡ ике грант алыу уларҙың мәҙәниәт һәм сәнғәт үҫешенә индергән өлөшөн таныуы тураһында һөйләй. «Арғымаҡ» Мексикала Бөтә донъя фольклориадаһында Рәсәй исеменән сығыш яһай, донъяға башҡорт мәҙәниәтенең үҙенсәлеген һәм матурлығын күрһәтә. Уларҙың ШОС һәм БРИКС саммиттарында сығыштары мәҙәни программаның сағыу биҙәге булып тора, ә THE SPIRIT OF TENGRI (Ҡаҙағстан), Мир Сибири (Красноярск крайы) һәм "Евразия йөрәге" (Башҡортостан) кеүек эре халыҡ-ара фестивалдәрҙә хедлайнер сифатында ҡатнашыуы төркөмдөң юғары статусын һәм донъя сәхнәһендәге ихтыяжын раҫлай[2][3].
2024 йылда музыкант яңы ойошторолған Ay Yola төркөмөнә ҡушыла. Уның составына шулай уҡ аталы-ҡыҙлы Руслан һәм Адель Шәйхетдиновтар инә. 2025 йылдың февралендә Ay Yola төркөмөнөң «Batyr» («Батыр») беренсе трегы, ә икенсе йыр «Homay» 14 мартта сыға, ул бер аҙна эсендә миллионлаған тыңлау йыя[2].
Шәхси тормошо
[үҙгәртергә | сығанаҡты үҙгәртеү]Ринат Рамаҙанов өйләнгән, ҡатыны Алиса менән улдары Әмирханды һәм ҡыҙҙары Әминәне тәрбиәләй[2].
Маҡтаулы исемдәре һәм башҡа бүләктәре
[үҙгәртергә | сығанаҡты үҙгәртеү]- миҙал «Ал да нур сәс халҡыңа!» (2019)
- Башҡортостан Республикаһының атҡаҙанған артисы (2019)
- Шәйехзада Бабич исемендәге дәүләт йәштәр премияһы лауреаты (2019)
- Башҡортостандың халыҡ артисы (2025)
Иҫкәрмәләр
[үҙгәртергә | сығанаҡты үҙгәртеү]- ↑ Суюндюкова Ирина. Из «Аргымака» − в «Ay Yola». В чём секрет успеха Рината Рамазанова, солиста взорвавшего сеть башкирского клипа. 18 май 2025 тикшерелгән.
- ↑ 2,0 2,1 2,2 2,3 2,4 Конова Инна. Рамазанов Ринат Загирович, 24СМИ. 18 май 2025 тикшерелгән.
- ↑ 3,0 3,1 Рамазанов Ринат, Мусикия. 18 май 2025 тикшерелгән.