Башҡортостан (гәзит)

«Башҡортостан»
Тип	Башҡортостан Республикаһының ижтимағи-сәйәси гәзите
Тиражы	30 мең (2011)
Веб-сайты	bashgazet.ru Наградалары:

Башҡортостан — Башҡортостан Республикаһының дәүләт телдәренең береһе булған башҡорт телендә нәшер ителгән төп ижтимағи-сәйәси гәзит. Баҫма республиканың район һәм ҡалаларындағы көндәлек ижтимағи-сәйәси хәлдәрҙе яҡтырта, башҡорт халҡының тарихы, мәҙәниәте һәм әҙәбиәте буйынса материалдар сығара, шулай уҡ милләттәштәребеҙ күпләп йәшәгән Рәсәй төбәктәренән төрлө характерҙағы материалдарҙы даими биреп бара. Халҡыбыҙҙың арҙаҡлы улдары һәм ҡыҙҙары тураһында очерктар һәм һүрәтләмәләр һәр ваҡыт донъя күрә. Бынан тыш гәзиттә көнитмештең төрлө яҡтарына ҡағылған һәм сәнәғәт, иҡтисад, хоҡуҡ, әхлаҡ, мәғариф, һаулыҡ һаҡлау, тирә-яҡ мөхит, спорт өлкәләрен яҡтыртҡан һәм башҡа темаларға ла, уҡыусылар хаттарына ла күпләп урын бирелә.

ХХ быуаттың һуңғы һәм ХХI быуаттың тәүге ун йыллыҡтарында гәзит аҙнаһына биш мәртәбә, ҡайһы бер йылдарҙа 30 меңдән дә артҡан тираж менән баҫылһа, һуңғы йылдарҙа аҙнаға дүрт тапҡыр сыға башланы. Йома көн һаны икеләтә күләмдә донъя күрә, «Башҡортостан» — «Йома» исеме аҫтында һәм үҙаллы индекс менән уға айырым яҙылыу ойошторола. 2014 йылдың тәүге яртыһында 13 мең 073 дана баҫылһа, 2015 йылдың тәүге яртыһында дөйөм тираж 11 мең 581 дана тәшкил итте.

Тарихы

Гәзит 1917 йылдың июнь айынан Ырымбурҙа «Башҡорт иттифаҡи бюроһының мөхбире» исеме менән сыға башлай. Июль айынан исемен «Башҡорт» тип үҙгәртәләр.1919 йылда «Башҡортостан» гәзите менән бергә «Башҡортостан хәбәрҙәре» гәзите булып баҫтырыла. Баштараҡ гәзит Стәрлетамаҡта, 1922 йылдан Өфөлә баҫтырыла. Гәзит исемен 1937 йылда «Qьđьl Başqortostan» («Ҡыҙыл Башҡортостан») тип, 1951 йылда «Совет Башҡортостаны» тип үҙгәртә. 1990 йылдан хәҙерге «Башҡортостан» исеме менән баҫтырыла башлай.

Гәзиттең төрлө йылдарҙағы баш мөхәррирҙәре

• Шәфиев Бәхтигәрәй Әғзәм улы (1918)
• Ғәхретдинов Ғ. Р. (1919)
• Йомағолов Харис Йомағол улы (1919)
• Йосопов Заһит Ғәйфулла улы, Шәрҡи Заһит (1919—1921)
• Юлтыев Дауыт Исхаҡ улы, Дауыт Юлтый (1921—1924)
• Иҙелғужин (1924—1926)
• Кәлимуллин Төхфәтулла Кәлимулла улы, Төхфәт Йәнәби (1926—1937)
• Аҙнабаев Ҡасим Ҡотлобирҙе улы (1937—1938)
• Ғөзәйеров Ғарифулла Вәли улы (1938—1940)
• Зөлҡәрнәев Ғәли Камал улы (1940—1945)
• Ғафаров Ғ. Ғ. (1945—1955)
• Рамаҙанов Ғилемдар Йыһандар улы (1955—1958)
• Нафиҡов Вәли Вәли улы (1958—1966)
• Исмәғилев Абдулла Ғиният улы (1966—1986)
• Әйүпов Мансур Әнүәр улы (1986—1990)
• Сәғитов Тәлғәт Ниғмәтулла улы (1990—1998)
• Хисамов Ғәлим Афзал улы (1998—1999)
• Кинйәбаев Рәлиф Мостаким улы (1999—2011)
• Сәлимов Ниязбай Булатбай улы (2011—09.2015)
• Юлдашбаев Азамат Рәмил улы (09.2015—тән

Бүләктәре

Гәзит 1968 йылда Хеҙмәт Ҡыҙыл Байраҡ ордены менән наградлана.

Һылтанмалар

• Башҡортостан (гәзит) // Башҡорт энциклопедияһы. — Өфө: БР ДАҒУ «Башҡорт энциклопедияһы», 2015—2024. — ISBN 978-5-88185-143-9.
• «Башкортостан» гәзите сайты