Башҡортостан (гәзит)

«Башҡортостан»
Тип	Башҡортостан Республикаһының ижтимағи-сәйәси гәзите
Тиражы	30 мең (2011)
Веб-сайты	bashgazet.ru Наградалары:

Башҡортостан — ижтимағи-сәйәси гәзит. Башҡортостан Республикаһының дәүләт телдәренең береһе булған башҡорт телендә Өфө ҡалаһында нәшер ителә.

Гәзитте ойоштороусылар — Башҡортостан Республикаһы Дәүләт Йыйылышы — Ҡоролтай һәм Башҡортостан Республикаһы Хөкүмәте.

Гәзит «Башҡорт иттифаҡи бюроһының мөхбире» тигән исем менән 1917 йылдың 14 июнендә сыға башлаған.

Баҫма республиканың район һәм ҡалаларындағы көндәлек ижтимағи-сәйәси хәлдәрҙе яҡтырта, башҡорт халҡының тарихы, мәҙәниәте һәм әҙәбиәте буйынса, шулай уҡ Рәсәйҙең башҡорттар күпләп йәшәгән төбәктәренән төрлө характерҙағы материалдарҙы даими биреп бара. Халҡыбыҙҙың арҙаҡлы улдары һәм ҡыҙҙары тураһында очерктар һәм һүрәтләмәләр һәр һан да тиерлек донъя күрә. Бынан тыш гәзиттә көнитмештең төрлө яҡтарына ҡағылған һәм сәнәғәт, иҡтисад, хоҡуҡ, әхлаҡ, мәғариф, һаулыҡ һаҡлау, тирә-яҡ мөхит, спорт өлкәләрен яҡтыртҡан һәм башҡа темаларға ла, уҡыусылар хаттарына ла күпләп урын бирелә.

ХХ быуаттың һуңғы һәм ХХI быуаттың тәүге ун йыллыҡтарында гәзит аҙнаһына биш мәртәбә, һуңғы йылдарҙа аҙнаға өс тапҡыр —шишәмбе, шаршамбы һәм йома сыға. Икеләтә күләмдә баҫылған йома көн һаны «Башҡортостан» — «Йома» исеме менән донъя күрә, һәм уға үҙаллы индекс менән айырым яҙылыу ҙа үткәрелә.

Тарихы

• Гәзит 1917 йылдың июнь айынан Ырымбурҙа «Башҡорт иттифаҡи бюроһының мөхбире» тигән исем менән башлап сыға. Июль айынан исеме «Башҡорт» тип үҙгәртелә.
• 1918 йылдың мартында Башҡортостандың Ваҡытлы революцион советы «Башҡортостан» гәзитен сығара.
• 1919 йылдан «Башҡортостан» һәм «Башҡорт» гәзиттәре нигеҙендә «Башҡортостан хәбәрҙәре» исемендә Стәрлетамаҡта нашер ителә.
• 1922 йылдан «Башҡортостан» исемендә Өфөлә башҡорт һәм татар телдәрендә сыға.
• 1924 йылдың авгусынан башҡортса ғына баҫтырыла.
• 1929 йылдан гәзит көн һайын сыға башлай.
• 1937 йылда гәзит исеме «Qьđьl Başqortostan» («Ҡыҙыл Башҡортостан»), 1951 йылда «Совет Башҡортостаны» тип үҙгәртелә.
• 1968 йылда Хеҙмәт Ҡыҙыл Байраҡ ордены менән бүләкләнә.
• 1990 йылдан «Башҡортостан» исеме менән донъя күрә.

Рубрикалар

• Мәғлүмәттәр
• Йәмғиәт
• Шәхестәр
• Башҡортостан Республикаһының норматив-хоҡуҡи акттары
• Сәйәсәт һәм хоҡуҡ
• Иҡтисад
• Социаль мәсьәлә
• Рухиәт
• Әҙәбиәт һәм мәҙәниәт
• Спорт һәм туризм
• Экология
• Ҡырағай мөхит

Гәзиттең төрлө йылдарҙағы баш мөхәррирҙәре

• Шәфиев Бәхтигәрәй Әғзәм улы (1918)
• Фәхретдинов Ғ. Р. (1919)
• Йомағолов Харис Йомағол улы (1919)
• Йосопов Заһит Ғәйфулла улы (Шәрҡи Заһит) (1919—1921)
• Дауыт Юлтый (1921—1924)
• Иҙелғужин Кәрим Абдулла улы (1924—1926)
• Төхфәт Йәнәби (1926—1937)
• Аҙнабаев Ҡасим Ҡотлобирҙе улы (1937—1938)
• Ғөзәйеров Ғарифулла Вәли улы (1938—1940)
• Зөлҡәрнәев Ғәли Камал улы (1940—1945)
• Ғафаров Ғ. Ғ. (1945—1955)
• Рамаҙанов Ғилемдар Йыһандар улы (1955—1958)
• Нафиҡов Вәли Вәли улы (1958—1966)
• Исмәғилев Абдулла Ғиниәт улы (1966—1986)
• Әйүпов Мансур Әнүәр улы (1986—1990)
• Сәғитов Тәлғәт Ниғмәтулла улы (1990—1998)
• Хисамов Ғәлим Афзал улы (1998—1999)
• Кинйәбаев Рәлиф Мөстәҡим улы (1999—2011)
• Сәлимов Ниязбай Булатбай улы (2011—09.2015)
• Юлдашбаев Азамат Рәмил улы (09.2015—04.2018)
• Ғәлин Самат Ғәлимйән улы (3.04.2018—22.06.2018) — урынбаҫар булараҡ, баш мөхәррир вазифаһын башҡарыусы.
• Исхаҡов Вәдүт Ғәйфулла улы — 2018 йылдың 22 июненән

Тиражы

Гәзит тиражы Йылдар 1923 1928 1930 1941 1951 1959 1966 1975 1979 Тираж, мең дана 0,9 5,35 9,9 20,1 16,0 23,2 51,0 67,6 79,7

Бүләктәре

Гәзит 1968 йылда Хеҙмәт Ҡыҙыл Байраҡ ордены менән наградлана.

Республика кимәлендә ойошторған саралары

• «Башҡортостан» гәзитенең 100 йыллығы уңайынан уҡтан атыу буйынса беренселек.

Һылтанмалар

• Башҡортостан (гәзит) // Башҡорт энциклопедияһы. — Өфө: БР ДАҒУ «Башҡорт энциклопедияһы», 2015—2024. — ISBN 978-5-88185-143-9.
• «Башкортостан» гәзите сайты