Нәбиуллин Рәфил Рауил улы

Нәбиуллин Рәфил Рауил улы —— Мәжит Ғафури исемендәге Башҡорт дәүләт академия драма театры актеры, Башҡортостандың халыҡ һәм Рәсәйҙең атҡаҙанған артисы.

Илеш районының Иҫке Хажи ауылында 1952 йылдың 26 ғинурында тыуған. Бер аҙҙан уларҙың ғаиләһе Өфөгә күсеп килә. Сәхнә менән Рәфил Рауил улы бала сағынан уҡ ҡыҙыҡһына: 19-сы мәктәптә уҡығанда Пионерҙар йортонда Валентина Тараканова етәкселегендәге балалар драма түңәрәгенә йөрөй башлай. Урта мәктәпте тамамлағас, Өфө дәүләт сәнғәт институтының театр факультетына килә. Унан һуң Совет Армияһы сафында хеҙмәт итә. Мәжит Ғафури исемендәге Башҡорт дәүләт академия драма театрына эшкә килгәс (1973 йыл), тәүге көндәрҙән үк үҙен талантлы, талапсан актер итеп күрһәтә. Репертуарында драма комедия менән үрелеп бара: «Медея»ла (Еврипид) — Ясон, «Ҡыҙ урлау»ҙа (М. Кәрим) — Шәрәй, «Аҫылйәр»ҙә (М. Фәйзи) — Ғәбдрәшит, «Йәрем минең, Алиһәм»дә (Р. Байбулатов) — Адам Федорович, «Әкәмәтле һөйөү»ҙә (Лопе де Вега) — Рикардо, «Аты барҙың — дәрте бар»ҙа (Н. Ғәйетбай) — Ҡотлобай, «Әйҙәгеҙ, танышайыҡ»та (Г. Әхмәтҡужина) — Самат һәм башҡалар. Рәфил Нәбиуллин 2002 йылда вафат булды.