Йосопов Вәкил Барый улы

Википедия — ирекле энциклопедия мәғлүмәте
Перейти к навигации Перейти к поиску
Пустой элемент Викиданных

Йосопов Вәкил Барый улы (20 февраль 1952 йыл) — актёр, режиссёр. Башҡортостан Республикаһының халыҡ (1993), БАССР-ҙың атҡаҙанған (1979) артисы. Театр эшмәкәрҙәре союзы ағзаһы (1979).

Биографияһы[үҙгәртергә | вики-тексты үҙгәртергә]

Вәкил Барый улы Йосопов 1952 йылдың 20 февралендә БАССР-ҙың Баймаҡ районы Әмин ауылында ишле ғаиләлә тыуған. Бала саҡтан Вәкил сәнғәткә, театрға ынтыла, уға хатта 15 йәшендә тыуған ауылында клуб менән идара итеүҙе ышанып тапшыралар. 1969 йылда районға Өфө дәүләт сәнғәт институтының режиссеры Бакиров килә һәм йәш кешенең актерлыҡ һәләттәренә иғтибар итә[1]. Шул уҡ йылда, Темәс урта мәктәбен тамамлағандан һуң, Вәкил Йосопов сәнғәт институтының театр бүлегенә (Ғ.Ғ.Ғиләжев, Ф.Ҡ.Ҡасимова курсы) уҡырға инә.

1973 йылда институтты тамамлағандан һуң Сибай дәүләт башҡорт драма театрында актер булып хеҙмәт итә (1973—1998 һәм 2000—2004 йылдарҙа). Рәсәй сәнғәт һәм мәҙәниәт хеҙмәткәрҙәренең белемен камиллаштырыу институтында белем ала (Мәскәү, 1996; М. М. Новохижин курсы). 1998—2000 йылдарҙа Ырымбур татар драма театрында режиссер булып эшләй, 2004 йылдан — «Сулпан» Сибай башҡорт балалар театры, бер үк ваҡытта 2005—2013 йылдарҙа — Сибай филармонияһы директоры. 2002 йылдан башлап Йосопов В. Б. шулай уҡ Сибай сәнғәт колледжында уҡыта.

Башҡортостан Республикаһы Хөкүмәтенең 2013 йылдың 20 июнендәге 770-р һанлы Ҡарарына ярашлы «Сулпан» Сибай башҡорт балалар театры һәм Сибай дәүләт филармонияһы Башҡортостан Республикаһының Сибай концерт-театраль берләшмәһенә ҡушылалар. Вәкил Барый улы концерт-театраль берләшмәһенең директоры итеп тәғәйенләнә (2013—2015). 2015 йылдан В. Йосопов — «Сулпан» театрының художество етәксеһе.

Актёр үҙенсәлекле ролдәрҙе лә: Садиҡ («Шайтан тоҡомо», Г.Мохтаров; дебют, 1974), Сильва («Өлкән улым» — «Старший сын), Анчугин («Төбәктә булған мәҙәктәр» — «Провинциальные анекдоты», икеһе лә — А. В. Вампилов), Сганарель («Дон Жуан», Мольер), комик ролдәрҙе лә: Ғәлим («Диләфрүзгә дүрт кейәү», Т.Ғ.Миңнуллин), Әлфәнис («Париж егете Әлфәнис», Л. В.Вәлиев), Абдулла («Һөйәһеңме — һөймәйһеңме?», Ф. М.Бүләков) берҙәй уңышлы башҡара[2].

Вәкил Йосопов үҙен әҫәрҙәрҙе оригиналь трактовкалай белгән талантлы режиссер булараҡ та танытты. Уның эштәре лиризм, яҡшы һәм йылы юмор менән айырылып тора. Сибай башҡорт драма театры сәхнәһендә Ә.Ҡ.Атнабаевтың «Мөхәббәт тураһында йыр» (дебют, 1995), «Ҡәһәрле мөхәббәт», Ырымбур татар драма театрында — «Һөйәһеңме — һөймәйһеңме?» (икеһе лә — Ф. Бүләков), Миңнуллиндың «Һөйәркә»; Әлмәт татар драма театрында — Н. Ғәйетбайҙың «Һөйәркәнде шкафҡа йәшер», Ф. Бүләковтың «Һөйәһенме — һөймәйһеңме?»; Сулпан» театрында — «Һәпрүш» (В. Н. Афониндың «Һәпрүш, йәки Һаумы, ҡауырһынлы Ғәжәп йән» — «Мымрёнок, или Здравствуй, Чудо в перьях» пьесаһы буйынса) һәм башҡа спектаклдәр ҡуя[2]. Шулай уҡ ул йыш ҡына дөйөм ҡала байрамдарының режиссеры булараҡ саҡырыла.

Маҡтаулы исемдәре һәм башҡа бүләктәре[үҙгәртергә | вики-тексты үҙгәртергә]

  • БАССР-ҙың атҡаҙанған артисы (1979 й.);
  • Башҡортостан Республикаһының халыҡ артисы (1993 й.);
  • Бөтә донъя башҡорттары Ҡоролтайының «Ал да нур сәс халҡыңа» миҙалы (2017 й.);
  • Башҡортостан Республикаһы Мәҙәниәт министрлығының Почет грамотаһы (12.04.1976 й.);
  • ВЛКСМ Үҙәк Комитетының Почет грамотаһы (1979 й.);
  • Башҡортостан Республикаһы Мәҙәниәт министрлығының Почет грамотаһы (февраль, 2002 й.);
  • Башҡортостан Республикаһы Хөкүмәтенең Почет грамотаһы (февраль 2009 й.);
  • Башҡортостан Республикаһы Хөкүмәтенең Почет грамотаһы (февраль, 2010 й.);
  • Башҡортостан Республикаһы Мәҙәниәт министрлығының Почет грамотаһы (март, 2012 й.);
  • Башҡортостан Республикаһы Президентының Почет грамотаһы (04.04.2012 й.);
  • Башҡортостан Республикаһы Хөкүмәтенең Почет грамотаһы (2012 й.)
  • Башҡортостан Республикаһы Дәүләт Йыйылышы — Ҡоролтайының Почет грамотаһы (29.02.2012 й.)
  • Рәсәй Театр эшмәкәрҙәре Союзының К. С. Станиславский исемендәге миҙалы (2015 й.);
  • Башҡортостан Республикаһы Мәҙәниәт министрлығының Почет грамотаһы (2017 й.);
  • Мәҙәниәт эшмәкәрҙәре профсоюз комитеты Президиумының Почет грамотаһы (2017 й.);
  • Рәсәй Федерацияһы Президентын һайлауҙарында әүҙем ҡатнашҡан өсөн Рәхмәт Хаты. В. В. Путиндың Йәмәғәт хуплауы Халыҡ штабы етәксеһе С. Говорухин тапшыра (2012 й.);
  • Төрлө йылдарҙа Сибай ҡалаһы һәм Баймаҡ районы хакимиәттәре тарафынан бирелгән Почет грамоталары.

Иҫкәрмәләр[үҙгәртергә | вики-тексты үҙгәртергә]

Сығанаҡтар[үҙгәртергә | вики-тексты үҙгәртергә]