ОКАТО

ОКАТО́ коды, ОКАТО́ һаны (рус. Общероссийский классификатор административно-территориальных объектов һүҙҙәренән ҡыҫҡартма) — Рәсәй Федерацияһының барлыҡ төбәктәре һәм тораҡ пункттарының дөйөм төркөмләүсе исемлеге; статистика һәм иҡтисад кеүек өлкәләрҙә мәғлүмәтте ышаныслы, сағыштырырлыҡ һәм автоматик рәүештә эшкәртеү өсөн булдырылған.

Иҫәп-теркәү берәмектәре

ОКАТО исемлегенә түбәндәге теркәү административ бүленеш берәмектәре инә:

• республикалар
• крайҙар
• өлкәләр
• Федераль әһәмиәткә эйә булған ҡалалар
• автономлы өлкәләр
• автономлы округтар
• райондар
• ҡалалар
• ҡала райондары һәм округтары
• ҡала тибындағы ҡасабалар
• ауыл советтары
• ауыл тораҡ пункттары (ауылдар, ҡасабалар, утарҙар, станицалар һ.б.)

Административ бүленеш берәмектәре исемлектә иерархия рәүешендә төркөмләнә.

Берәмектәренең барыһы ла административ бүленеш буйынса төркөмдәргә бүленә; был төркөмдәр административ буйһоноу буйынса өс классификация кимәленә ҡарай. Билдәле кимәлгә ингән һәр берәмек үрге кимәлгә ҡараған ярашлы берәмеккә туранан-тура буйһона.

Классификацияның беренсе кимәленә федерал әһәмиәткә эйә булған берәмектәр ҡарай:

• республикалар
• крайҙар
• өлкәләр
• Федераль әһәмиәткә эйә булған ҡалалар
• автономлы өлкәләр
• * Рәсәй Федерацияһы составына ингән автономлы округтар.

Икенсе кимәлгә түбәндәгеләр ҡарай:

• край йәиһә өлкә составына ингән автономлы округтар
• Республика, край, өлкә, автономлы өлкә, Рәсәй Федерацияһы составына ингән автономлы округ райондары; ҡала-эсе райондары, Федераль әһәмиәткә эйә булған ҡала округтары
• республика, край, өлкәлргә буйһонған ҡалалар һәм ҡасабалар.

Өсөнсө кимәлгә түбәндәгеләр ҡарай:

• республика, край, өлкәләргә буйһонған ҡалаларҙың эске райондары һәм округтары
• районға буйһонған ҡалалар
• районға буйһонған ҡала тибындағы ҡасабалар
• ауыл советтары.

Ауыл тораҡ пункттары өсөнсө кимәл берәмектәре эсендә танытыла.

ОКАТО һаны төҙөлөшө миҫалы

Миҫал өсөн, Учалы районының Ҡарт Муйнаҡ ауылының ОКАТО һаны — 80 253 884 004. Был һан ошондай өлөштәрҙән төҙөлгән:

• 80 (1-се һәм 2-се һан урыны) — Башҡортостан Республикаһы;
• 2 (3-сө урын) — «район» билдәһе (классификацияның өсөнсө кимәле) — бынан һуң район тураһында мәғлүмәт бирелә;
• 53 (4-се һәм 5-се урын) — Учалы районы коды;
• 8 (6-сы урын) — «ауыл советы» билдәһе — бынан һуң ауыл советы тураһында мәғлүмәт бирелә;
• 84 (7-се һәм 8-се урын) — Туңғатар ауыл советы коды;
• 004 (9-сы, 10-сы һәм 11-се урын) — Ҡарт Муйнаҡ ауылын танытҡан код.

Һылтанмалар

• «Территориальное устройство России» сайтында ОКАТО тураһында мәғлүмәт 2012 йыл 5 март архивланған.
• ОКАТО СИРИУС НТ сайты — Интернетта ОКАТО һанын белеү өсөн(недоступная ссылка).
• ОКАТО 2014 йыл 17 декабрь архивланған. Адрес буйынса ОКАТО һанын белеү хеҙмәте.