Ҡотлобаевтар
| Ҡотлобаевтар | |
| | |
| Нәҫел китабы теркәлгән губерна: | |
|---|---|
| Башлап ебәреүсе: |
Зөбәйер Ҡотлобаев |
| Барлыҡҡа килгән урыны: |
Бөрө өйәҙе (хәҙер Башҡортостан Республикаһы Борай районы) Йәлдәк улусының Кәмил ауылы |
Подданлығы: | |
Ҡотлобаевтар — башҡорт дворяндары нәҫеле. Ырымбур губернаһы Бөрө өйәҙе (хәҙер Башҡортостан Республикаһы Борай районы) Йәлдәк улусының Кәмил ауылы башҡорттарынан.
Дөйөм характеристика[үҙгәртергә | сығанаҡты үҙгәртеү]
Ҡотлобаевтар нәҫелен башлап ебәреүсе Зөбәйер Ҡотлобаев була. Зөбәйер Ҡотлобаев 1823—1835 йылдарҙа 10-сы башҡорт кантоны башлығы вазифаһын үтәй. Уның улдары:
- Уйылдан Зөбәйер улы Ҡотлобаев — хорунжий (1836)[1].
- Ноғман Зөбәйер улы Ҡотлобаев (1809 — ?) — хорунжий. 1816 йылдан хәрби хеҙмәттә була. 1832 йылдан Ырымбур ҡалаһында, һуңынан 10‑сы башҡорт кантонында хеҙмәт итә, 1837—1846 йылдарҙа кантон башлығы ярҙамсыһы вазифаһын үтәй. Ҡустыһы Камилйән менән бергә Йәлдәк улусында урынлашҡан 3 поташ заводына эйә булған[2].
- Камилйән Зөбәйер улы Ҡотлобаев — зауряд-хорунжий. Ағаһы Ноғман менән бергә Йәлдәк улусында урынлашҡан 3 поташ заводына эйә булған[2].
- Раян Зөбәйер улы Ҡотлобаев (1815 — ?) — хорунжий (1841)[3]. 1839—1842 йылдарҙа 10‑сы башҡорт кантоны башлығы вазифаһын башҡара.
- Абдулкәбир Зөбәйер улы Ҡотлобаев — зауряд-яҫауыл (1812)[4].
Уйылдан Зөбәйер улы Ҡотлобаевтың улдары:
- Лоҡманхаким Уйылдан улы Ҡотлобаев — зауряд-хорунжий. 1863—1865 йылдарҙа 6-сы Бөрө кантоны башлығының ярҙамсыһы була[5].
- Миһран Уйылдан улы Ҡотлобаев — 1862—1863 йылдарҙа 16-сы кантон башлығы вазифаһын үтәй[6]. 1863—1865 йылдарҙа 6-сы Бөрө кантоны башлығының ярҙамсыһы була[5].
- Мостафа Уйылдан улы Ҡотлобаев ер биләүсе, урман сәнәғәтсеһе була. Ырымбур губерна канцелярияһында секретарь булып хеҙмәт итә. Ырымбур губернаһында 3 мең дисәтинәнән ашыу ер биләй, шуның 1,8 мең дисәтинәһе — Бөрө өйәҙендә, 0,5 меңе — Бәләбәй өйәҙендә, 0,8 меңе Өфө өйәҙендә була. Уның улдары:
- Мортаза Мостафа улы Ҡотлобаев (1873 — ?) — юрист. 1895 йылдан Мәскәү университетында уҡыған. 1908 йылдан — Минзәлә өйәҙендә, 1917 йылдан Бәләбәй ҡалаһында Юстиция министрлығында суд тәфтишсеһе булып эшләй.
- Искәндәр Мостафа улы Ҡотлобаев (? — 1910) — нәшерсе. Ҡазан университетын тамамлаған, 1906—1908 йылдарҙа «Тауыш» гәзитенең мөхәррире һәм нәшерсеһе. Ҡатыны — Ҡотлобаева Раҡия Шәйхәттәр ҡыҙы (1886−1966), ҡыҙы — Ҡотлобаева Ҡәҙриә Искәндәр ҡыҙы (1909—1997).
1866 йылда Миһран һәм Мостафа Ҡотлобаевтарҡа нәҫелдән күсә килеүсе дворяндар дәрәжәһе бирелә. Ҡотлобаевтар нәҫеле Ырымбур губерна дворян нәҫел тарихы китабына теркәлгән[7].
Башҡа билдәле вәкилдәре:
- Шакир Ҡотлобаев — башҡорт милли-азатлыҡ хәрәкәте эшмәкәре. 1918 йылдың башында Бөрө өйәҙендә Башҡортостан мөхтәриәтенә ҡушылыу мәсьәләләре буйынса ҡоролтай ойоштора. Аҙаҡ бында Борай кантоны булдырыла.
Шулай уҡ ҡарағыҙ[үҙгәртергә | сығанаҡты үҙгәртеү]
Иҫкәрмәләр[үҙгәртергә | сығанаҡты үҙгәртеү]
- ↑ Ильясова А. Я., 2015, с. 127
- ↑ 2,0 2,1 Тагирова Л. Ф., 2012, с. 120-121
- ↑ Ильясова А. Я., 2015, с. 132
- ↑ Ильясова А. Я., 2015, с. 133
- ↑ 5,0 5,1 Тагирова Л. Ф., 2012, с. 158
- ↑ Тагирова Л. Ф., 2012, с. 101
- ↑ Ильясова А. Я., 2015, с. 120
Әҙәбиәт[үҙгәртергә | сығанаҡты үҙгәртеү]
- Ильясова А. Я. История башкирского дворянства. — Уфа: Китап, 2015. — 232 с. — ISBN 978-5-295-06335-0.
- Тагирова Л. Ф. Кантонные начальники Башкирии: национальная региональная элита первой половины XIX века. 2-е изд., переработанное и исправленное. — Уфа: УНЦ ИИЯЛ, 2012. — 164 с. — ISBN 978-5-91608-071-1.
Һылтанмалар[үҙгәртергә | сығанаҡты үҙгәртеү]
- Ильясова А. Й. Ҡотлобаевтар // Башҡорт энциклопедияһы. — Өфө: БР ДАҒУ «Башҡорт энциклопедияһы», 2015—2024. — ISBN 978-5-88185-143-9.