Сөләймәнова Фәниә Байгилде ҡыҙы

Сөләймәнова-Хәлитова Фәниә Байгилде ҡыҙы
	Сөләймәнова-Хәлитова Фәниә Байгилде ҡыҙы
Тыуған көнө:	18 февраль 1939
Тыуған урыны:	Башҡорт АССР-ы Йомағужа (хәҙерге Мәләүез) районы Һыртлан ауылы
Вафат булған көнө:	29 июнь 2026 (87 йәш)
Вафат булған урыны:	Өфө ҡалаһы
Гражданлығы:	СССР → Рәсәй Федерацияһы
Эшмәкәрлеге:	йырсы, журналист
Әҫәрҙәре яҙылған тел:	башҡортса
Наградалары:	Башҡортостандың халыҡ артисы

Сөләймәнова-Хәлитова Фәниә Байгилде ҡыҙы (18 февраль 1939 йыл — 29 июнь 2026 йыл) — йырсы, радиожурналист. 1983 йылдан СССР Журналистар союзы ағзаһы. БАССР-ҙың атҡаҙанған мәҙәниәт хеҙмәткәре (1981), Башҡортостан Республикаһының халыҡ артисы (1994). Шәһит Хоҙайбирҙин исемендәге премия лауреаты (1996).

Биографияһы

Фәниә Байгилде ҡыҙы Сөләймәнова (Хәлитова) 1939 йылдың 18 февралендә Йомағужа (хәҙерге Мәләүез) районы Һыртлан ауылында тыуған.

1958 йылда Йомағужа мәктәбен тамамлай. Ошо уҡ йылда райондар буйлып талантлы йәштәрҙе йыйып йөрөгән музыка белгесе Н. А. Болотов йәш ҡыҙҙы Мәскәү консерваторияһына уҡырға саҡыра. Әммә был саҡырыу бойомға ашмай ҡала, һәм уны уҡыуҙар башланғас булһа ла Өфө сәнғәт училищеһына телеграмма менән саҡыртып алалар. А. Х. Чемборисова класында уҡый һәм сәнғәт училищеһын 1962 йылда тамамлай. Артабан Башҡорт дәүләт филармонияһына солист-воколист булып эшкә урынлаша. 1970 йылда Өфө йорт төҙөү-фанера комбинаты клубының музыка мәктәбендә эшләй.

1971 йылдан «Башҡортостан» теле-радио компанияһында мөхәррир, 1977 йылдан өлкән мөхәррир, ә 1990—2004 йылдарҙа комментатор булып эшләй. Юлдаш, Ашҡаҙар радиоларында ҡулланылған элекке яҙмалар — Фәниә Сөләймәнованың бөртөкләп йыйған хеҙмәт емештәре. «Музыкаль мөхәррирҙең эше, — тип билдәләй Фәниә Байгилде ҡыҙы, — тапшырыуҙар әҙерләүҙән генә тормай. Уның күләгәлә ҡалған төп эше — ул фонд йыйыу. Үҙем мөхәррир булып эшләгән йылдарҙа Бөтә Союз радиоһынан ике тапҡыр (1978, 1987 йылдарҙа) бригада саҡыртып, музыка фондын булдырыуға өлгәштем».

Үҙе эшләгән осорҙа Фәниә Байгилде ҡыҙы яңынан-яңы радио тапшырыуҙар ойоштора, уларҙың күбеһе музыка, йыр менән бәйле була. Уның тырышлығы менән «Илһам», «Йыр менән ҡанатланып», «Халыҡ моңон — халыҡ күңеленә» һәм башҡа тапшырыуҙар булдырыла. Бындай тапшырыуҙарға билдәле артистар, композиторҙарҙан тыш, моң яратҡан ябай ауыл кешеләре лә саҡырыла. Радиола эшләү менән бер рәттән, Ф. Б. Сөләймәнова концерттарҙа ла сығыш яһай. Ул башҡарған «Таштуғай», «Сәлимәкәй», «Ашҡаҙар», «Зөлхизә» һәм башҡа халыҡ йырҙарын тамашасылар йылы ҡабул итә.

Ветеран 2026 йылдың 29 июнендә Өфө ҡалаһында вафат була^[1].

Тапшырыуҙары

Илһам
Йыр менән ҡанатланып
Музыка донъяһы
Тере хәтер
Һеҙҙә ниндәй хәлдәр бар?
Халыҡ моңон — халыҡ күңеленә

Ғаиләһе

улы: Хәлитов Айрат Шамил улы (1963)
икенсе ире: Сөләймәнов Әхмәт Мөхәмәтвәли улы (1939—2016)

Маҡтаулы исемдәре һәм башҡа бүләктәре

БАССР-ҙың атҡаҙанған мәҙәниәт хеҙмәткәре (1981)
Башҡортостан Республикаһының халыҡ артисы (1994)
Шәһит Хоҙайбирҙин исемендәге премия лауреаты (1996)

Иҫкәрмәләр

↑ Лейла Аралбаева. В Башкирии ушла из жизни ветеран радио, журналист и певица Фания Халитова (урыҫ). ИА «Башинформ» (29 июнь 2026). Дата обращения: 1 июль 2026. (рус.)

Һылтанмалар

Башҡорт энциклопедияһы 2016 йыл 21 апрель архивланған.

[1] Лейла Аралбаева. В Башкирии ушла из жизни ветеран радио, журналист и певица Фания Халитова (урыҫ). ИА «Башинформ» (29 июнь 2026). Дата обращения: 1 июль 2026. (рус.)

[1]