Йәнекәев Булат Һиҙиәт улы

Википедия — ирекле энциклопедия мәғлүмәте
Перейти к навигации Перейти к поиску
Йәнекәев Булат Һиҙиәт улы
Тыуған көнө 1942
Тыуған урыны СССР, РСФСР, Башҡорт АССР-ы, Баймаҡ районы

Йәнекәев Булат Һиҙиәт улы (21 ғинуар 1942) — халыҡ музыканты, йырсы. Башҡортостан Республикаһының атҡаҙанған мәҙәниәт хеҙмәткәре (1993).

Булат Һиҙиәт улы Йәнекәев 1942 йылдың 21 ғинуарында БАССР-ҙың Баймаҡ районы 1-се Моҡас ауылында тыуған. Дүрт-биш тирәһендә бәхетһеҙлеккә тарып, ике күҙенән тома һуҡыр булып ҡала[1]. Бик бәләкәй саҡтан уҡ музыкаль һәләттәре асыла, ул гармунда, скрипкала, мандолинал, ҡурайҙа уйнарға өйрәнә[1]. Белорет районының Үрге Әүжән ауылындағы махсус интернат-мәктәптә уҡый. 1957 йылда Мәскәүҙә Бөтә донъя йәштәр һәм студенттар фестивалендә ҡатнаша.

1959 йылдан алып Бөтә Рәсәй Һуҡырҙар йәмғиәтенең Белорет уҡыу-производство предприятиеларында эшләй, 1964 йылдан Металлургтар мәҙәниәт һарайының башҡорт халыҡ театрында — музыкаль биҙәүсе. 1979 йылда Бәләбәйгә күсә, 1979—2003 йылдарҙа Бәләбәй уҡыу-производство предприятиеларында эшләй. Ҡурайсылар һәм башҡорт фольклор ансамблдәре төҙөй, бер үк ваҡытта 1992 йылдан башлап Бәләбәй ҡалаһында 1-се балалар сәнғәт мәктәбендә, 2003—2009 йылдарҙа башҡорт гимназияһында музыканан уҡыта[2]. Булат Һиҙиәт улы етәкселегендәге башҡорт фольклор ансамбле I һәм III Бөтә Союз халыҡ ижады фестивалдеренең лауреаты була.

Йәнекәев Булат халыҡ традицияларына таянып, йырлауҙы ҡурай һәм баянда уйнау менән тәбиғи берләштерә. Репертуарында башҡор халыҡ йырҙары: «Кәкүк», «Сибай», «Һыр», «Урал», «Әллүки»; М.Ғ.Имашев, З.Ғ.Исмәғилев, М.Ә.Мозафаров, Р. М.Хәсәнов, Х. Ф.Әхмәтов һәм башҡалар әҫәрҙәре. «Мостай маршы» инструменталь пьесаһы (2004) һәм башҡорт, татар шағирҙары һәм үҙ һүҙҙәренә яҙылған 300-ҙән ашыу йыр, шул иҫәптән Р.Хәкимйәндең «Красноусол вальсы», үҙ һүҙҙәренә «Бәләбәй уттары», «Тыуған ауылым», «Һағындым» йырҙары авторы[2].

Йәнекәев Булат Һиҙиәт улының исеме республикала бик тиҙ таныла, йыр-моң һөйөүселәрҙең ихтирамын һәм һөйөүен яулай, уның йырҙары радио һәм телевидение тапшырыуҙарында йыш яңғырай[1].

Маҡтаулы исемдәре һәм башҡа бүләктәре[үҙгәртергә | вики-тексты үҙгәртергә]

  • Башҡортостан Республикаһының атҡаҙанған мәҙәниәт хеҙмәткәре (1993).
  • Бөтә Рәсәй һуҡырҙар үҙешмәкәр сәнғәте смотры лауреаты (1970),
  • Бөтә Союз хеҙмәтсәндәр үҙешмәкәр художестволы ижады фестивале лауреаты (1977; икеһе лә — Мәскәү),
  • Бөтә Рәсәй Һуҡырҙар йәмғиәтенең Башҡҡортостан идаралығы республика үҙешмәкәр сәнғәт смотрҙары (Өфө, 1974, 1989; Бәләбәй, 1987),
  • «Башҡорт халыҡ йыры — 91» республика конкурсы лауреаты (1991),
  • «Еңеү яҙы» һәүәҫкәрҙәр ижады фестивале (Өфө, 1995),
  • Халыҡ-ара ҡурайсылар һәм йырсылар конкурсы (Ҡаҙан, 1998) лауреаты[2].

Иҫкәрмәләр[үҙгәртергә | вики-тексты үҙгәртергә]

  1. 1,0 1,1 1,2 Баймаҡ еренең күренекле улдары һәм ҡыҙҙары. Библиографик белешмә. Баймаҡ ҡалаһы. 2010 йыл, 66 бит.
  2. 2,0 2,1 2,2 http:///index.php/component/content/article/8-statya/6173-j-nek-ev-bulat-i-i-t-uly |ЙӘНЕКӘЕВ Булат Һиҙиәт улы

Сығанаҡтар[үҙгәртергә | вики-тексты үҙгәртергә]

  • Баймаҡ еренең күренекле улдары һәм ҡыҙҙары. Библиографик белешмә. Баймаҡ ҡалаһы. 2010 йыл, 66 бит.

ЙӘНЕКӘЕВ Булат Һиҙиәт улы // Башҡорт энциклопедияһы — Өфө: «Башҡорт энциклопедияһы» ғилми-нәшриәт комплексы, 2015—2019. — ISBN 978-5-88185-143-9.