Бәхтейәров Әнүәр Сәхибгәрәй улы

Бәхтейәров Әнүәр Сәхибгәрәй улы
	Бәхтейәров Әнүәр Сәхибгәрәй улы
Зат	ир-ат
Гражданлыҡ	СССР; Рәсәй
Тыуған көнө	10 декабрь 1928
Тыуған урыны	Көҙән, Стәрлетамаҡ кантоны, Башҡорт АССР-ы, РСФСР, СССР
Вафат булған көнө	25 июнь 1995 (66 йәш)
Вафат булған урыны	Яңауыл, Башҡортостан Республикаhы, Рәсәй
Уҡыу йорто	Маҡар урта мәктәбе
Сәйәси фирҡә ағзаһы	Советтар Союзы Коммунистар партияһы
Маҡтаулы исемдәре һәм башҡа бүләктәре

Бәхтейәров Әнүәр Сәхибгәрәй улы (10 декабрь 1928 йыл — 25 июнь 1995 йыл) — нефтсе, хужалыҡ эшмәкәре. 1966—1989 йылдарҙа «Краснохолмнефть» нефть һәм газ сығарыу идаралығы начальнигы. Башҡорт АССР-ының 8‑се саҡырылыш Юғары Советы депутаты. РСФСР‑ҙың атҡаҙанған нефть һәм газ сәнәғәте хеҙмәткәре (1989), БАССР‑ҙың атҡаҙанған (1971), СССР‑ҙың почётлы (1987) нефтсеһе. СССР-ҙың нефть сәнәғәте отличнигы (1972). Октябрь Революцияһы (1981), Хеҙмәт Ҡыҙыл Байраҡ (1976) һәм «Почёт Билдәһе» (1971) ордендары кавалеры.

Биографияһы

Әнүәр Сәхибгәрәй улы Бәхтейәров 1928 йылдың 10 декабрендә Башҡорт АССР-ының Стәрлетамаҡ кантоны^[2] Көҙән ауылында тыуған. Маҡар урта мәктәбен, 1952 йылда Мәскәү нефть институтын тамамлай^[3], тау инженер-нефтсеһе.

Әнүәр Бәхтейәров — Туймазы, Ҡансура, Краснохолмск нефть һәм газ ятҡылыҡтарын үҙләштереүҙә ҡатнашыусыларҙың һәм Башҡортостандың төньяҡ-көнбайышында нефть сығарыуҙы ойоштороусыларҙың береһе. Ул 17 нефть ятҡылығын эшкəртеүгə əҙерлəүҙə һəм үҙлəштереүҙə ҡатнаша. Уйлап табыуға биш авторлыҡ танытма ала. Баҫма эштәр авторы.

1952—1956 йылдар — «Октябрьскнефть» нефть һәм газ сығарыу идаралығында инженер, өлкән инженер һәм бүлек начальнигы;

1956—1966 йылдар — «Ишембайнефть» нефть һәм газ сығарыу идаралығының баш инженеры;

1966 йылдан 1989 йылға тиклем — «Краснохолмнефть» нефть һәм газ сығарыу идаралығы башлығы. Был вазифаға идаралыҡ барлыҡҡа килгәндән һуң бер йыл үткәс, «Ишембайнефть» нефть һәм газ сығарыу идаралығының баш инженеры вазифаһынан килә. Унан һуң алмашҡа килеүсе — Юрий Гаврилович Пензин^[4].

Бәхтейәров Әнүәр Сәхибгәрәй улы 1995 йылдың 25 июнендә Яңауыл ҡалаһында вафат була. Тыуған ерендә — Көҙәндә ерләнгән.

Хәтер

1995 йылда Яңауыл урамдарының береһе Бәхтейәров исеме менән атала. Яңауыл ҡала советының 1995 йылдың 25 декабрендәге ҡарарында былай тиелә: "…Бәхтейәров Әнүәр Сәхибгәрәй улының ҡаланың социаль-иҡтисади үҫешенә индергән ҙур өлөшөн иҫәпкә алып… «Заречный» биҫтәһендәге Ялан (Полевая) урамын «Бәхтейәров» урамы тип үҙгәртергә. Был урамда Бәхтейәровтар ғаиләһе йәшәгән^[5].

Маҡтаулы исемдәре һәм башҡа бүләктәре

РСФСР нефть һәм газ сәнәғәтенең атҡаҙанған хеҙмәткәре (1989)
БАССР-ҙың атҡаҙанған нефтсеһе (1976)
СССР-ҙың нефть сәнәғәте отличнигы (1972)
Октябрь Революцияһы ордены (1981)
Хеҙмәт Ҡыҙыл Байраҡ ордены (1976)
«Почёт Билдәһе» ордены (1971)
миҙалдар.

Иҫкәрмәләр

Әҙәбиәт

Инженеры Урала: Энциклопедия / Рос. инженер. акад. Ур. отд-ние; [Редкол.: Данилов Н. И. гл. ред. и др.]. — Екатеринбург : Уральский рабочий, 2001. — 694, [1] с. : портр.; 27 см. С.53

Һылтанмалар

Бәхтейәров Әнүәр Сәхибгәрәй улы // Башҡорт энциклопедияһы. — Өфө: БР ДАҒУ «Башҡорт энциклопедияһы», 2015—2024. — ISBN 978-5-88185-143-9. (Тикшерелеү көнө: 7 декабрь 2022)
Патенты автора Бахтияров, Анвар Сахибгареевич

[_7be6d68240fc668f-1] 1,0 ^1,1 Башкирская энциклопедия (урыҫ) — Башкирская энциклопедия, 2005. — 4344 с.

[2] хәҙер Башҡортостан Республикаһының Ишембай районы

[3] База выпускников 1930—2012 < ВЫПУСКНИКИ < Выпускники РГУ Нефти и Газа 2015 йыл 18 май архивланған.

[4] Республика Башкортостан//ЮБИЛЕИ:Главная награда Юрия Пензина. Этого человека любят и уважают не только в Янауле: Жизненный путь ветерана башкирской нефти, почетного гражданина… 2015 йыл 18 май архивланған.

[5] Улица Бахтиярова " Город Янаул — информационно-развлекательный портал

[1]

[2]

[3]

[4]

[5]