Әстәғәфируллаһ

Әстәғәфируллаһ
ғәр. أستغفر الله‎
Әҫәрҙең теле	Ғәрәп теле

Әстәғәфируллаһ, Әстәғәфирулла (ғәр. أستغفر الله‎; рус. астагфируллах) — Аллаһы тәғәлә алдында ғәфү үтенеү, тәүбә итеү зекере. Тамыр һүҙ «ғәфәрә» — «ғәфү итеү» ҡылымынан яһалған.

Ҡулланылышы

Кеше үҙенең гонаһтарын, хаталарын аңлаһа, Аллаһ алдында «әстәғәфируллаһ» тип ғәфү үтенергә тейеш.

Ҡөрьәндә

Ҡөрьән Кәримдең бер нисә сүрәһендә был хаҡта аяттар бар. Әл-Бәҡара сүрәһенән 222-се аят:

Ысынлап та, Алла тәүбә иткәндәрҙе һәм таҙарынғандарҙы ярата! Әл-Бәҡара 2:222

Ән-Ниса сүрәһенән 149-сы аят:

Әгәр яҡшы эште асыҡ эшләһәгеҙ йәки йәшерен ҡалдырһағыҙ, йәки берәй яманлыҡты ғәфү үтенеү менән япһағыҙ, ысынлап та, Аллаһ кисереүсе һәм ҡөҙрәтле! Ән-Ниса 4:149

Әлү Ғимран сүрәһенән 16-сы, 17-се аяттар:

«Раббыбыҙ! Беҙ иман килтерҙек! Беҙҙең гонаһтарыбыҙҙы ярлыҡа, беҙҙе ут ғазабынан һаҡла!» — тигәндәрҙе,— сабыр итеүселәрҙе, дөрөҫөн һөйләүселәрҙе, түбәнселеклеләрҙе, мал сарыф итеүселәрҙе, һәм таң ваҡытында ярлыҡау һораусыларҙы Әлү Ғимран 3:16, 17

Тәүбә шарттары

Ихлас тәүбә итеү өсөн өс шарт бар:

• Киләсәктә гонаһ ҡылыуҙан баш тартырға ниәт. Йәғни, хилаф эштең гонаһлы икәнен аңлап, кеше артабан да гонаһтан йыраҡлашырға тейеш.
• Ихлас күңелдән үкенеү һәм тәүбә итеү тойғоһо.
• Аллаһыға мөрәжәғәт итеп, тәүбә итеү кешенең гонаһтарын тик Аллаһ ҡына ҡаплай алыуын, йәғни Уның ғәфү итә алыуын аңлау.

Аллаһтан кисереүҙе һорап үҙ һүҙҙәрең менән теләгән бер телдә доға ҡылырға мөмкин. Әммә быны, быны Мөхәммәт Пәйғәмбәр кеүек тулы итеп — «әстәғәфируллаһ үә әтүбү иләйһи» (Аллаһынан ғәфү үтенәм һәм тәүбә итәм), тип, уның ғәрәп телендә тәржемәһен һәм мәғәнәһен аңлап тәүбә итеү хәйерлерәктер

Шулай уҡ ҡарағыҙ

• Үәрд

Әҙәбиәт

• Ньюби Г. Краткая энциклопедия ислама = A Concise Encyclopedia of Islam / Пер. с англ.. — М.: Фаир-пресс, 2007. — 384 с. — 3000 экз. — ISBN 978-5-8183-1080-0.